នេះជាការលើកឡើងរបស់លោកឧបនាយករដ្ឋមន្រ្តីប្រចាំការ ប៊ិន ឈិន និងជារដ្ឋមន្រ្តីស្តីទីទទួលបន្ទុកទីស្តីការគណៈរដ្ឋមន្រ្តី នៅព្រឹកថ្ងៃទី ០១ ខែឧសភា ឆ្នាំ ២០១៧នេះ ក្នុងឱកាសអញ្ជើញជាតំណាងដ៏ខ្ពង់ខ្ពស់របស់លោកនាយករដ្ឋមន្រ្តី ហ៊ុន សែន ក្នុងពិធីសំណេះសំណាលជាមួយកម្មករ កម្មការិនី បុគ្គលិកកំពង់ផែស្វយ័តក្រុងព្រះសីហនុ នាឱកាសទិវាពលកម្មអន្តរជាតិ លើកទី១៣១។
លោកឧបនាយករដ្ឋមន្រ្តីប្រចាំការ ប៊ិន ឈិន បានមានប្រសាសន៍ទៅកាន់ កម្មករ កម្មការិនី និងនិយោជិតកំពុងផែស្វយ័តក្រុងព្រះសីហនុថា កំពង់ផែស្វយ័តក្រុងព្រះសីហនុ គឺជាច្រកសេដ្ឋកិច្ចជាតិដែលមានចរិតជាអង្គភាពយុទ្ធសាស្រ្តក្នុងការទ្រទ្រង់សកម្មភាពពាណិជ្ជកម្ម អន្តរជាតិរបស់កម្ពុជាសម្រាប់ជំរុញកំណើនសេដ្ឋកិច្ចជាតិកន្លងមក និងនាពេលបច្ចុប្បន្ន ហើយនិងបន្តទៅអនាគត។
លោកឧបនាយករដ្ឋមន្រ្តីប្រចាំការ ក៏បានបញ្ជាក់ថា ថ្ងៃទី០១ ឧសភា គឺជាទិវាប្រវត្តិសាស្ត្ររបស់ពិភពលោកទាំងមូលដែលត្រូវបានប្រារព្ធឡើងដើម្បីរម្លឹកឡើងវិញអំពីភាពជោគជ័យរបស់ពលករកាលពី ១៣១ ឆ្នាំ ដែលបានទាមទារឱ្យមានការទទួលស្គាល់តម្លៃនៃពលកម្ម និងគោរពតាមលក្ខខណ្ឌស្មើភាពក្នុងការប្រកបការងារគ្រប់ប្រភេទដោយគ្មានការរើសអើង។ ចំពោះប្រទេសកម្ពុជាយើងវិញ ចាប់តាំងពីថ្ងៃ ០៧ ខែមករា ឆ្នាំ១៩៧៩ ដែលជាថ្ងៃរំដោះប្រជាជនកម្ពុជាពីរបបប្រល័យពូជសាសន៍មក រាជរដ្ឋាភិបាល បានប្រារព្ធទិវាពលកម្មអន្តរជាតិ ជារៀងរាល់ថ្ងៃទី ០១ ខែឧសភា ដែលជាថ្ងៃបុណ្យការងាររបស់ប្រជាពលករ និងជាថ្ងៃឈប់សម្រាករបស់មន្រ្តីរាជការ និងកម្មករ និយោជិតទាំងអស់ ដែលនេះជាការបញ្ជាក់យ៉ាងច្បាស់ អំពីការយកចិត្តទុកដាក់របស់រាជរដ្ឋាភិបាល ចំពោះកម្មករ និយោជិត និងអង្គការសហជីពទាំងអស់នៅកម្ពុជា។
លោកឧបនាយករដ្ឋមន្រ្តីប្រចាំការ ក៏បានសង្កត់ធ្ងន់ផងដែរថា ក្នុងនីតិកាលទី៥ នេះ រាជរដ្ឋាភិបាលបានបន្តការវិនិយោគលើវិស័យហេដ្ឋារចនាសម្ព័ន្ធគមនាគមន៍ និងការកែលម្អថែមទៀតនូវកិច្ចសម្រួលពាណិជ្ជកម្មដើម្បីកសាងប្រព័ន្ធទ្បូជិស្ទីកដ៏រស់រវើកតាមរយៈការសាងសង់បណ្តាញដឹកជញ្ជូនពហុសណ្ឋានក្នុងគោលដៅធានាឱ្យបាននូវការតភ្ជាប់ផ្ទៃក្នុងប្រទេស និងការតភ្ជាប់ជាមួយប្រទេសក្នុងតំបន់ និងពិភពលោក ដើម្បីលើកកម្ពស់ការវិនិយោគ និងពាណិជ្ជកម្ម ពិសេសការយកចិត្តទុកដាក់នឹងត្រូវផ្តោតទៅលើការបញ្ចប់ទាំងស្រុងនូវការស្តារ និងការអភិវឌ្ឍផ្លូវដែក ការបន្តអភិវឌ្ឍហេដ្ឋារចនាសម្ព័ន្ធឤកាសយានដ្ឋាន និងកំពង់ផែ ការសិក្សាអំពីសក្តានុពល និងការវិនិយោគលើការដឹកជញ្ជូនតាមផ្លូវទឹក ព្រមទាំងការកែសម្រួលសេវាពាក់ព័ន្ធនឹងការដឹកជញ្ជូនមួយចំនួនដែលនឹងនាំមកនូវ៖ (១)ការកាត់បន្ថយថ្លៃដឹកជញ្ជូន (២) ការ បង្កើនភាពឤចទុកចិត្តបាននិងភាពស័ក្តិសិទ្ធិ (៣) ការពង្រឹងភាពប្រកួតប្រជែង និង (៤) ការបង្កើនការវិនិយោគ និងពាណិជ្ជកម្ម។
លោកឧបនាយករដ្ឋមន្រ្តីប្រចាំការ ប៊ិន ឈិន បានបន្ថែមថា រាជរដ្ឋាភិបាលក៏បន្តជំរុញការចូលរួមរបស់វិស័យឯកជនក្នុងការអភិវឌ្ឍវិស័យ ហេដ្ឋារចនាសម្ព័ន្ធគមនាគមន៍ តាមរយៈការពង្រឹង និងការកែលម្អយន្តការភាពជាដៃគូ រវាងវិស័យសាធារណៈ និងវិស័យឯកជន ដើម្បីបង្កើនភាពទាក់ទាញ និងសម្រួលដល់ការអនុវត្តគម្រោងហេដ្ឋារចនាសម្ព័ន្ធដែលហិរញ្ញប្បទាន ដោយវិស័យឯកជន។ សមិទ្ធផលទាំងឡាយដែលយើងរួមគ្នាសម្រេចបានកន្លងមក ស្ថិតនៅក្នុងស្មារតីសុទិដ្ឋិនិយមដ៏ជ្រាលជ្រៅចំពោះអនាគតដ៏ភ្លឺស្វាងរបស់កម្ពុជា។
នៅចុងបញ្ចប់កម្មវិធី លោកឧបនាយករដ្ឋមន្រ្តីប្រចាំការ ក៏បានណែនាំចំពោះគ្រប់សមត្ថកិច្ច្ ស្ថាប័ន និង អង្គភាពដែលមានការពាក់ព័ន្ធទាំងអស់នៅទីនេះ សូមបន្តបង្កើនកិច្ចសហការ និងសម្របសម្រួលជាមួយគ្នាអោយ បានជិតស្និទ្ធ មានតម្លាភាព និងប្រសិទ្ធភាពខ្ពស់ ដើម្បីកែលំអប្រព័ន្ធគ្រប់គ្រងសេវាកម្មគ្រប់ផ្នែកនៅក្នុងកំពង់ផែនេះឱ្យបានកាន់តែល្អប្រសើរឡើង ដែលទាំងអស់នេះ គឺជាប្រការដ៏សំខាន់បំផុតសម្រាប់លើកកម្ពស់ការជឿទុកចិត្ត ពីសំណាក់អតិថិជន វិនិយោគិនជាតិ អន្តរជាតិ និងអ្នកផ្តល់ជំនួយទាំងឡាយមកលើការប្តេជ្ញារបស់យើងក្នុងការ កសាង និង អភិវឌ្ឍប្រទេសជាតិ៕
