លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចកម្ពុជាសម្រាប់អាស៊ាន បានថ្លែងទៅកាន់ប្រមុខរដ្ឋ និងតំណាងវិស័យឯកជននានាប្រមាណ ២០០នាក់ថា អាស៊ានបានឆ្លើយតបយ៉ាងវិជ្ជមានចំពោះបញ្ហាទាំងក្នុងតំបន់ និងអន្តរជាតិ ជាពិសេសធានាបាននូវសន្តិភាព សន្តិសុខ ស្ថិរភាព និងសុវត្ថិភាពសម្រាប់ប្រជាជនអាស៊ាន និងនៅលើពិភពលោកភាគច្រើន។ លោករដ្ឋមន្ត្រី បានគូសបញ្ជាក់ដូចនេះខណៈចូលរួមជាតំណាងដ៏ខ្ពង់ខ្ពស់របស់លោកនាយករដ្ឋមន្រ្តី ហ៊ុន សែន នៅក្នុងពិធីជប់លៀងអាហារពេលល្ងាចស្តីពី «អាស៊ាន ក្រោយ ៥០ឆ្នាំ» រៀបចំឡើងដោយវិទ្យាស្ថានយុទ្ធសាស្ត្រអាស៊ាន និងភាពជាអ្នកដឹកនាំ (ASLI) កាលពីរាត្រីថ្ងៃសុក្រទី២៨ ខែមេសា ឆ្នាំ២០១៧។
លោក ប៉ាន សូរស័ក្តិ ក៏បានបញ្ជាក់ថា ក្នុងនាមសមាជិកដែលមានភាពទទួលខុសត្រូវនៃប្រទេសក្នុងតំបន់ កម្ពុជាបានត្រៀមខ្លួនរួចជាស្រេច ក្នុងការសហការជាមួយភាគីពាក់ព័ន្ធ ដើម្បីប្រឹងប្រែងឆ្ពោះទៅសម្រេច «ចក្ខុវិស័យអាស៊ាន ឆ្នាំ២០២៥៖ ឈានទៅមុខជាមួយគ្នា» នៅលើវិថីសន្តិភាព សន្តិសុខ ស្ថិរភាព និងវិបុលភាពយូរអង្វែងសម្រាប់ប្រជាជាតិទាំងអស់ នៅក្នុងតំបន់។
លោករដ្ឋមន្ត្រី ក៏បានស្នើដល់ប្រមុខរដ្ឋនៃប្រទេសសមាជិកអាស៊ាន ផ្តោតយកចិត្តទុកដាក់ ទៅលើរបៀបវារៈគន្លឹមួយចំនួនដូចជា៖
១- ពង្រឹង និងពង្រីកកិច្ច សហប្រតិបត្តិការអាស៊ាន
២- ធានាថែមទៀតនូវភាពធន តុល្យភាព និរន្តភាព និងការរីកចម្រើនសេដ្ឋកិច្ច សម្រាប់ ទាំងអស់គ្នា
៣- ជំរុញការអនុវត្តផែនការមេស្តីពីការតភ្ជាប់អាស៊ាន ២០២៥
៤- ពន្លឿនសេចក្តីសម្រេចចិត្តលើកិច្ចព្រមព្រៀងពាណិជ្ជកម្ម ភាពជាដៃគូសេដ្ឋកិច្ច ទូលំ ទូលាយក្នុងតំបន់ និង
៥)បន្តជំរុញឧត្តមភាពអាស៊ាន នៅក្នុងកិច្ចសហការកម្រិតតំបន់ និងពង្រឹងសមត្ថភាពអាស៊ាន ក្នុងការដោះស្រយបញ្ហាកម្រិតតំបន់ និងពិភពលោក។
គួររម្លឹកដែរថា កំឡុងពេលបីទស្សវត្សចុងក្រោយ អាស៊ានសម្រេចបាននូវវឌ្ឍនភាពដ៏សំខាន់ជាមួយសមិទ្ធិផលជាច្រើន។ ចាប់ពីឆ្នាំ២០០៧ ដល់២០១៥ ផលិតផលក្នុងស្រុកសរុបរបស់អាស៊ានបានកើនឡើងទ្វេដងចំនួន ២,៥ទ្រីលានដុល្លារអាមេរិក ខណៈដែលផលិតផលក្នុងស្រុកសរុបសម្រាប់មនុស្សម្នាក់បានលើសពី ៨០% គឺស្មើនឹង ៤.០០០ដុល្លារអាមេរិក។ នៅចុងឆ្នាំ ២០១៥ អាស៊ានបានក្លាយជាសហគមន៍សេដ្ឋកិច្ច ដែលមានឥទ្ធិពលខ្លាំងជាងមុន ពោលគឺអាស៊ានបានក្លាយជាទីផ្សារធំលំដាប់ទី៣ នៅអាស៊ី និងទី៧ នៅលើពិភពលោក ដែលមានទំហំពាណិជ្ជកម្មធំលំដាប់ទី ៤ បន្ទាប់ពីប្រទេសចិន, អាឡឺម៉ង់, និងសហរដ្ឋអាមេរិក៕
