នៅថ្ងៃទី៣០ ខែមេសា ឆ្នាំ២០១៧ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមកម្មវិធីពិនិត្យសុខភាពដោយឥតគិតថ្លៃរបស់ក្រុមគ្រូពេទ្យស្មគ្រ័ចិត្តជូនបងប្អូនប្រជាពលរដ្ឋនៅខណ្ឌចំការមនដែលរៀបចំឡើងដោយសហភាពសម្ព័ន្ធសហជីពជាតិកម្ពុជា សហការជាមួយសង្កាត់ទាំ១២នៃខ័ណ្ឌចំការមន។
ថ្លែងសំណេះសំណាលក្នុងឱកាសនោះ លោករដ្ឋមន្រ្តី បានថ្លែងអំណរគុណដល់អាជ្ញាធរខណ្ឌចំការមន,ចៅសង្កាត់ទាំង១២, សហភាពសហព័ន្ធយុវជនកម្ពុជា
ដែលមានលោក ហ៊ុន ម៉ានី ជាប្រធាន និងសហការី, សម្ព័ន្ធគ្រូពេទ្យស្ម័គ្រចិត្តសហភាពសហព័ន្ធយុវជនកម្ពុជា និងសភាសម្ព័ន្ធសហជីពជាតិកម្ពុជា ដែលមានលោក សោម អូន ជាប្រធាន និងសហការី, លោកវេជ្ជបណ្ឌិត និងក្រុមគ្រូពេទ្យដែលបានចូលរួមកម្មវិធីពិនិត្យសុខភាពដោយឥតគិតថ្លៃរបស់ក្រុមគ្រូពេទ្យស្មគ្រ័ចិត្តជូនបងប្អូនប្រជាពលរដ្ឋ និងកម្មករ កម្មការិនី ក្នុងខណ្ឌចំការមន។ នេះជាសកម្មភាពមនុស្សធម៌ និងជាអំពើល្អមួយដែល លោកវេជ្ជបណ្ឌិត លោកគ្រូពេទ្យស្មគ្រ័ចិត្តបានផ្ដល់ជូនបងប្អូនប្រជាពលរដ្ឋនៅខណ្ឌចំការមនយើង។ សុខភាពពិតជាមានតម្លៃណាស់សម្រាប់មនុស្សគ្រប់គ្នា។
លោក អ៊ិត សំហេង បានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់លោកនាយករដ្ឋមន្រ្តី ហ៊ុនសែន បានយកចិត្តទុកដាក់ណាស់ដល់បញ្ហាសុខភាពប្រជាពលរដ្ឋយើង ហើយវិស័យសុខាភិបាលបានរីកចម្រើនខ្លាំងមានពេទ្យ មានមន្ទីរពេទ្យដើម្បីឆ្លើយតបទៅនឹងតម្រូវការរបស់ប្រជាជន។
ក្រុមគ្រូពេទ្យស្មគ្រ័ចិត្តដែលឧបត្ថម្ភដោយលោក ហ៊ុន ម៉ានី បានធ្វើសកម្មភាពមនុស្សធម៌ជាច្រើន ដើម្បីជួយដល់ប្រជាជនដោយមិនប្រកាន់និន្នាការនយោបាយ ដែលកន្លងមកបានចុះទៅតាមកន្លែងជាច្រើន ជួយដល់ប្រជាជននិង កម្មករ និយោជិត រាប់ម៉ឺននាក់ប្រកបដោយប្រសិទ្ធភាព។ វេជ្ជបណ្ឌិតលោកគ្រូពេទ្យស្មគ្រ័ចិត្តទាំងអស់សុទ្ធតែមានសមត្ថភាព និងទេពកោសល្យ ជាគ្រូពេទ្យជំនាញពិតៗសូមបងប្អូនប្រជាពលរដ្ឋជឿជាក់ពីព្រោះពួកគាត់សុទ្ធតែជាអ្នកធ្វើការនៅតាមមន្ទីរពេទ្យ។
លោករដ្ឋមន្រ្តី ក៏បានបញ្ជាក់ថា ឆ្នាំនេះប្រជាពលរដ្ឋខ្មែរយើងនិងបងប្អូនកម្មករ នៅក្នុងប្រទេស និងក្រៅប្រទេស បានធ្វើបុណ្យចូលឆ្នាំខ្មែរយ៉ាងសប្បាយរីករាយ ដោយសារយើងមានសុខសន្តិភាព ស្ថិរភាពនយោបាយ និងសណ្តាប់ធ្នាប់សង្គម ហេដ្ឋារចនាសម្ព័ន្ធរីកចម្រើន ផ្លូវស្ពាន អាគារខ្ពស់ៗ ផលិតផលស្រូវបរិបូណ៍ កំណើនសេដ្ឋកិច្ចជាតិជាមធ្យមប្រចាំឆ្នាំ៧% អត្រាភាពក្រីក្ររបស់ប្រជាជនត្រូវបានកាត់បន្ថយមកត្រឹម១៣,៥% និងអត្រាមានការងារធ្វើចំនួន៩៩,៣%។
ការតម្លើងប្រាក់ឈ្នួលអប្បរមាសម្រាប់កម្មករនិយោជិតចំនួន ១៥៣ ដុល្លា រួមនិងប្រាក់អត្ថប្រយោជន៍ផ្សេងៗបានទទួលពី១៧០ ដុល្លារ ទៅ១៨១ដុល្លា សម្រាប់ឆ្នាំ២០១៧។
លោក អ៊ិត សំហេង ក៏បានបញ្ជាក់ថា ការលើកលែងការបង់ពន្ធលើប្រាក់អត្ថប្រយោជន៍ផ្សេងៗរបស់កម្មករនិយោជិត។ ការតបណ្តាញទឹកនិងអគ្គីសនីក្នុងតម្លៃថោកតាមផ្ទះជួលរបស់កម្មករនិយោជិត សិស្ស និស្សិតការផ្តល់នូវអត្ថប្រយោជន៍ផ្សេងៗតាមរយៈបេឡាជាតិរបបសន្តិសុខសង្គមដូចជារបបហានិភ័យការងារ របបថែទាំសុខភាព និងរបបសោធននិវត្តនៅពេលខាងមុខ ការតម្លើងប្រាក់បៀវត្សមន្រ្តីរាជការឱ្យបានយ៉ាងតិច ១ លានរៀល លើកលែងការបង់ពន្ធក្នុងការផ្ទេរទ្រព្យសម្បត្តិពីឪពុកម្តាយទៅកូន លើកលែងការបង់ថ្លៃប្រថាប់ត្រា ការធ្វើសំបុត្រកំណើត សំបុត្រមរណៈភាព អត្តសញ្ញាណប័ណ្ណ សៀវភៅស្នាក់នៅ និងសៀវភៅគ្រួសារ និងលិខិតបញ្ជាក់នានាដោយឥតបង់ថ្លៃ ការកាត់បន្ថយអត្រាប្រាក់កម្ចីនៅត្រឹម ១៨% និងការគិតគូរដល់ការផ្តល់សេវា និងភាពងាយស្រួលជូនប្រជាជនកាន់តែច្រើនថែមទៀត។
ឆ្លៀតក្នុងឱកាសនោះ លោករដ្ឋមន្រ្តី ក៏សូមអំពាវនាវឱ្យបងប្អូនប្រជាពលរដ្ឋទាំងអស់ ត្រូវរួមគ្នាការពារសន្តិភាពស្ថិរភាពឱ្យគង់វង្សដើម្បីបន្តការអភិវឌ្ឍន៌ប្រទេសយើងកាន់តែសម្បូរសប្បាយថែមទៀត និងសូមអញ្ជើញទៅបោះឆ្នោតជ្រើសរើសក្រុមប្រឹក្សាឃុំ សង្កាត់ នៅថ្ងៃទី០៤ ខែមិថុនា ឆ្នាំ២០១៧ ខាងមុខគ្រប់ៗគ្នា៕
