កាលពីរសៀលថ្ងៃទី ២៨ ខែមេសា ឆ្នាំ២០១៧ លោកឧបនាយករដ្ឋមន្រ្តី ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះជួយខេត្តបាត់ដំបង បានអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលជាមួយអាជីវករចំនួន ១២៣៣ នាក់ ក្នុងខេត្តបាត់ដំបង នៅសាលមហោស្រពស្ទឹងសង្កែ ក្រុងបាត់ដំបង ខេត្តបាត់ដំបង ។
នាឱកាសជួបសំណេះសំណាលនាពេលនោះ លោកឧបនាយករដ្ឋមន្រ្តី ស ខេង ក៏បានលើកឡើងអំពីស្ថានភាពទូទៅនៃប្រទេសកម្ពុជា មូលដ្ឋានសំខាន់ ៗ នៃការអភិវឌ្ឍន៍ប្រទេស ការថែរក្សាស្ថិរភាព សន្តិសុខសង្គម និងអំពីដំណើរការឆ្ពោះទៅរកការបោះឆ្នោត ជ្រើសរើសក្រុមប្រឹក្សាឃុំសង្កាត់ ឆ្នាំ២០១៧ ដែលទាំងអស់គ្នាត្រូវចូលរួម និងធានាឱ្យបាននូវបរិយាកាសល្អ និងភាពសុខសាន្តជូនប្រជាពលរដ្ឋ៕
