នៅព្រឹកថ្ងៃទី២៨ ខែមេសា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានដឹកនាំគណៈ ប្រតិភូជាន់ខ្ពស់ទៅចូលរួមក្នុងកិច្ចប្រជុំកំពូលអាស៊ានលើកទី៣០ នៅទីក្រុងម៉ានីឡា ប្រទេសហ្វីលីពីន ក្រោមមូលបទ «រួមគ្នាជាដៃគូ ដើម្បីធ្វើការផ្លាស់ប្តូរ រួមចំណែកជាមួយពិភពលោក» ដែលនឹងមានការពិភាក្សា និងផ្លាស់ប្តូរទស្សនៈ លើបញ្ហាជាសារវ័ន្តនានា ដែលអាស៊ាន និងពិភពលោកកំពុងប្រឈម ដើម្បីលើកតម្កើងសន្តិភាព សន្តិសុខ និងវិបុលភាពសម្រាប់តំបន់ និងពិភពលោកដែលនឹងប្រព្រឹត្តទៅនៅថ្ងៃទី ២៩ ខែមេសា ឆ្នាំ២០១៧។
នៅក្នុងក្របខ័ណ្ឌកិច្ចប្រជុំកំពូលអាស៊ានលើកទី៣០នេះ លោក ហ៊ុន សែន នឹងជួបថ្នាក់ដឹកនាំអាស៊ាន តំណាងអន្តរសភាអាស៊ាន និងតំណាងយុវជនអាស៊ានផងដែរ ក្នុងពេលដែលអាស៊ានប្រារព្ធខួបលើកទី៥០ នៅឆ្នាំ២០១៧នេះ៕
