នៅពេលខ្លះយើងសង្កេតឃើញថា ពេលមានភ្លៀងពិសេសភ្លៀងកក់ខែ ឬភ្លៀងនៅដើមរដូវវស្សាក៏មានធ្លាក់មកជាមួយនូវ ព្រិល ឬទឹកកក (អាស្រ័យទៅលើការការនិយមហៅតាមតំបន់) តែបើតាមការពន្យល់បែបវិទ្យាសាស្ត្រនោះគឺជាដុំទឹកកក។ នេះបើយោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី២៤ ខែមេសា ឆ្នាំ២០១៧នេះ។
ក្រសួងធនធានទឹក បានបញ្ជាក់ថា ភ្លៀងលាយឡំជាមួយនឹងការធ្លាក់ដុំទឹកកកនេះកើតឡើង ដោយសារ៖ ១- កម្រិតសីតុណ្ហភាពអតិបរមា ក្នុងបរិយាកាសបានថយចុះយ៉ាងគំហុក។ ២- ខ្យល់បក់បោកបញ្រ្ចាសទិស មានល្បឿនលឿនខ្លាំងធ្វើឱ្យធូលី និងសារធាតុមួយចំនួនប៉ើងឡើងទៅក្នុងបរិយាកាស។ ខ្យល់នេះ ក៏នាំយកនូវម៉ាសខ្យល់ត្រជាក់ មកកាន់បរិយាកាសលើផ្ទៃដី ជំរុញឱ្យអុកស៊ីតកម្មរហ័សទៅលើអុកស៊ីតករក្នុងបរិយាកាស បង្កឱ្យចំហាយទឹក និងសមាសធាតុចម្រុះក្នុងខ្យល់ ងាយកកជាដុំទឹកកក និងធ្លាក់មកកាន់ផែនដីភ្លាមៗ ដែលបាតុភូតនេះ ត្រូវបានអ្នកវិទ្យាសាស្រ្តហៅថា Invertion។
ក្រសួងធនធានទឹក ក៏បានបញ្ជាក់ថា កាលពីល្ងាចថ្ងៃទី២៣ ខែមេសា ឆ្នាំ២០១៧ នៅក្នុងក្រុង បានលុង ខេត្តរតនគិរី ក៏មានភ្លៀងធ្លាក់ លាយឡំនឹងដុំទឹកកកនេះដែរ។ ដោយហេតុថា ដុំទឹកកក ដែលធ្លាក់មកជាមួយភ្លៀង កកើតឡើងពីសមាសធាតុចម្រុះ ដូចនេះ គួរកុំយកដុំទឹកកកនេះទៅបរិភោគ ព្រោះវាអាចបង្កឱ្យមានការប៉ះពាល់ដល់សុខភាព ចំពោះទឹកភ្លៀងក៏មានកម្រិតជាតិអាស៊ីតខ្ពស់ដែរ៕
