នៅថ្ងៃទី២៤ ខែមេសា ឆ្នាំ ២០១៧នេះ កាកបាទក្រហមកម្ពុជា បានប្រគល់ឱ្យប្រើប្រាស់ជាផ្លូវការនូវ អណ្តូងទឹកស្អាតចំនួន១៤ (មានលេខរៀងពីទី ០២៨ដល់ទី ០៤១) ក្រោមអធិបតីភាពលោកវេជ្ជបណ្ឌិត អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា តំណាងដ៏ខ្ពង់ខ្ពស់លោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងមានការអញ្ជើញចូលរួមពី សមាជិក សមាជិការ គណៈកម្មាធិការសាខា ព្រមទាំងនាយក សមាជិក សមាជិកា សាខា និងអនុសាខា ជូនប្រជាជននៅតំបន់ដាច់ស្រយាល និងផ្លូវពិបាកធ្វើដំណើរ ព្រមទាំងខ្វះខាតទឹកប្រើប្រាស់ចំនួន ២៥០ គ្រួសាស្មើនឹង ១,៦៦០ រស់នៅឃុំ ប៉ក់ញ៉ៃ ឃុំ ប៉ាតេ ឃុំ យ៉ាទុង និង ឃុំ បរខាំ។
លោកវេជ្ជបណ្ឌិត អ៊ុយ សំអាត បានពាំនាំបណ្តាំផ្ញើរបស់លោកស្រី ប៊ុន រ៉ានី ហ៊ុន សែន សូមឲ្យបងប្អូនជួយថែរក្សាអណ្តូង និងមានអនាម័យជុំវិញអណ្តូង។ ដោយឡែកស្ត្រីចាប់ពីវ័យបន្តពូជត្រូវទៅទទួលសេវាពីមណ្ឌលសុខភាព ដើម្បីកាត់បន្ថយអត្រាឈឺស្លាប់របស់កុមារអាយុក្រោមប្រាំឆ្នាំ និងចូលរួមគោរពច្បាប់ចរាចរ បើកបរប្រកបដោយសុវត្ថិភាព ជៀសវាងការប្រើប្រាស់គ្រឿងញៀន និងគ្រឿងស្រវឹង។
ប្រជាពលរដ្ឋចំនួន២០០នាក់ ដែលចូលរួមក្នុងពិធីនោះ មានក្តីរីករាយឥតឧបមាក្រោយទទួលបានសមិទ្ធផលថ្មីនេះ ហើយស្ត្រីម្នាក់ៗទទួលបាន សារុង ១ រីឯបុរសម្នាក់ៗទទួលបាន ក្រមា១ ដោយឡែកចាស់ៗទទួលបានថវិកាមួយចំនួនបន្ថែមទៀត។
គួររំលឹកផងដែរថា អណ្តូងទាំងនេះត្រូវបានលោកស្រីប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្រេចផ្តល់កាលពីថ្ងៃទី ១៥ ខែ កុម្ភៈ ឆ្នាំ ២០១៧ សម្រាប់ផ្តល់ជូនប្រជាពលរដ្ឋខ្វះខាតទឹកប្រើប្រាស់ចំនួន ៣៥០ គ្រួសារ ស្មើមនុស្ស ១,៦៦០ នាក់ នៅឃុំ ប៉ក់ញ៉ៃ ឃុំ ប៉ាតេ ឃុំ យ៉ាទុង និងឃុំ បរខាំ ស្រុក អូរយ៉ាដាវ ខេត្តរតនគិរី ហើយមកទល់បច្ចុប្បន្ននេះ កាកបាទក្រហមកម្ពុជា បានផ្តល់អណ្តូងទឹកស្អាតចំនួន៤១ អណ្តូង តាំងពីឆ្នាំ ២០១០មក។ ដោយឡែកនេះជាជំហានទី២ ចំនួន ១៤ ចំណាយទឹកប្រាក់អស់៣៩.០៥២,២២ ដុល្លាអាមេរិក៕
