ពិធីបុណ្យចូលឆ្នាំខ្មែររយៈពេលបីថ្ងៃកន្លងមកនេះ បានបង្ហាញឱ្យឃើញនូវការរីកចំរើន និងការសម្បូរណ៍សប្បាយរបស់ប្រជាជនខ្មែរគ្រប់រូប គ្រប់ទីកន្លង ក្រោមដំបូលនៃសន្តិភាពដ៏កម្រក្នុងប្រវត្តិសាស្រ្តខ្មែរសម័យថ្មី។ តើមានកត្តាអ្វីទៅដែលធ្វើឱ្យយើងទាំងអស់គ្នាជាខ្មែរអាចរួបរួមគ្នារក្សាបាននូវវប្បធម៌ ទំនៀមទម្លាប់ និងប្រពៃណីជាតិយើងបានគង់វង្ស និងរីកចំរើនជាលំដាប់មកដល់ពេលនេះបាន?
ខែ្មរយើងប្រារព្វពិធីចូលឆ្នាំនៅខែចែត្រដោយមានការរៀបចំជាសំខាន់នូវការលេងល្បែងប្រពៃណី ដូចជាចោលឈូង បោះអង្គុញ ទាញព្រាត់ លាក់កន្សែង និងរាំលេងកំសាន្ត ក៏ដូចជាស្រង់ព្រះនៅគ្រប់ទិសទីជាដើម។ នៅមុនពេលពិធីបុណ្យជិតចូលមកដល់ គេនាំគ្នាប្រុងប្រៀបរៀបចំម្ហូបអាហារ នំចំណី ត្រីសាច់និងគ្រឿងសំភារៈផ្សេងៗ សម្អាតផ្ទះសម្បែង រួមទាំងសំលៀកបំពាក់ថ្មីៗទៅតាមទំលាប់ពីដូនតារៀងមករបស់ប្រជាជនខ្មែរយើង។
ជាងនេះទៅទៀត ចាប់តាំងពីប្រទេសកម្ពុជាមានសន្តិភាពពេញលេញ មានឯកភាពជាតិ ឯកភាពទឹកដី ប្រទេសកាន់តែមានការអភិវឌ្ឍ ជីវភាពប្រជាជនកាន់តែល្អប្រសើរ រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានរៀបចំឱ្យមានអង្គរសង្រ្កាន្ត និងសង្រ្កាន្តនៅតាមបណ្តារាជធានី-ខេត្ត ស្រុក ក្រុងនានាទូទាំងប្រទេស បង្កលក្ខណៈសប្បាយរីករាយដល់ប្រជាជនគ្រប់ច្រកល្ហកជារៀងរាល់ឆ្នាំដើម្បីបន្តពង្រីកពង្រឹងប្រពៃណីទំនៀមទម្លាប់ខ្មែរឱ្យកាន់តែរីកចំរើន និងការទាក់ទាញទេសចរ និងការចូលរួមការអភិរក្ស និងអភិវឌ្ឍផងក្នុងស្មារតីបណ្តុះការសាមគ្គីជាតិផងក្រោមដំបូលនៃសុខសន្តិភាពដែលយើងទាំងគ្នាត្រូវរក្សាឱ្យបានគង់វង្ស។
ប្រាកដណាស់វប្បធម៌រលត់ជាតិរលាយ តែប្រសិនបើសុខសន្តិភាពគ្មាននោះ ជាតិក៏រលត់រលាយដែរ។ អាស្រ័យដោយសុខសន្តិភាពពេញលេញបានផ្តល់ឱកាសឱ្យប្រជាជនកាន់តែបានរៀបចំការសប្បាយគ្រប់ទីកន្លែងមិនថានៅទីក្រុង និងជនបទឡើយ។ ការធ្វើដំណើរកំសាន្តកាន់តែទាក់ទាញច្រើនឡើងៗអាស្រ័យដោយការអភិវឌ្ឍហេដ្ឋារចនាសម្ព័ន្ធរូបវ័ន្ត រួមមាន៖ ស្ពាន ផ្លូវថ្នល់ សាលារៀន មន្ទីរពេទ្យ ប្រព័ន្ធធារាសាស្ត្រ វត្តអារាម ទីតាំងទេសចរណ៍ប្រវត្តិសាស្ត្រវប្បធម៌សំបូរបែប ស្ទើរគ្រប់ទីកន្លែង ស្របតាមកំណើនជីវភាពរស់នៅរបស់ប្រជាជនផងនៅផងនោះ។ តើមានពេលណាទៀតដែលយើងមានឱកាសបែបនេះ ដើម្បីបានរក្សាវប្បធម៌ទំនៀមទម្លាប់ជាតិយើងបានគង់វង្សដូចសព្វថ្ងៃនេះ?
ជារួមយើងមានភ័ព្វសំណាងកើតជាខ្មែរបានកសាងសន្តិភាពឡើងវិញបានចាប់តាំងសម័យបែកបាក់អង្គរ រហូតមកដល់ពេលដែលយើងអាចបង្កើតបានការឯកភាពជាតិ ឯកភាពទឹកដីក្នុងសម័យទំនើបថ្មីនេះ ដើម្បីអាចបន្តថែរក្សា និងអភិវឌ្ឍវប្បធម៌ ទំនៀមទម្លាប់ប្រពៃណីជាតិយើងឱ្យកាន់តែផូរផង់ ស្របពេលដែលប្រទេសជាតិយើងមានសេដ្ឋកិច្ចកាន់តែរីកចំរើន និងប្រជាជនមានជីវភាពកាន់តែល្អប្រសើរ។ ដូច្នេះហើយ យើងនឹងអាចជៀសផុតពីវប្បធម៌រលត់ជាតិរលាយ ហើយប្រសិនបើសន្តិភាពរលាយ វប្បធម៌ទំនៀមទម្លាប់ប្រពៃណីក៏ចៀសមិនពីផុតរលាយដែរ៕
ដោយ៖ សំរិទ្ធខ្មៅ
