នៅថ្ងៃទី ៦ ខែមេសា ព្រះមហាក្សត្រ Vajiralongkorn បានចុះហត្ថលេខាលើរដ្ឋធម្មនុញ្ញទី ២០ របស់ថៃ។ រដ្ឋធម្មនុញ្ញបានតាក់តែងថ្មី និងលុបចោលនៅក្នុងប្រទេសនោះ ចាប់តាំងពីការបញ្ចប់របបរាជានិយមផ្តាច់ការនៅឆ្នាំ ១៩៣២ ជារឿយៗដោយគ្មានបញ្ហាធំ ឬការសប្បាយក្អាកក្អាយនោះទេ។ ក្នុងខណៈដែលរដ្ឋធម្មនុញ្ញថ្មីនោះបានជួបនឹងការមិនសាទរពីសាធារណជនស្រដៀងគ្នានោះ ដំណើរផ្លូវដែលវាបានឆ្លងកាត់នោះបានផ្តល់នូវយល់ឃើញដ៏កម្រទៅក្នុងការគ្រងរាជ្យថ្មីដ៏សម្ងាត់របស់ស្តេច Vajiralongkorn និងរបៀបដឹកនាំរបស់ព្រះអង្គ។
ព្រះមហាក្សត្រនោះបានឡើងគ្រងរាជ្យនៅថ្ងៃទី ១ ខែធ្នូ ឆ្នាំ ២០១៦ រយៈពេល ១ ខែកន្លះបន្ទាប់ពីបិតារបស់ព្រះអង្គចូលទីវង្គត្ត បន្ទាប់ពីរយៈពេល ៧ ទសវត្សរ៍នៃការគ្រងរាជ្យ។ នៅពេលប្រទេសនោះកាន់ទុក្ខព្រះមហាក្សត្រជាទីស្រលាញ់នោះ ការឡើងស្នងរាជ្យនោះបានបណ្តាលឲ្យមានការព្រួយបារម្ភក្នុងចំណោមប្រជាជនថៃអំពីអនាគតនៃស្ថាប័ននោះ និងការសង្ស័យទៅលើសមត្ថភាពរបស់ព្រះមហាក្សត្រថ្មីនោះដើម្បីធ្វើឲ្យដូចព្រះបិតារបស់ព្រះអង្គ។
មនុស្សជាច្រើនបានមើលឃើញស្តេចថ្មីនោះថាជា មនុស្សចោលម្សៀត ដែលចាប់អារម្មណ៍ច្រើនលើរថយន្តប្រណាំង លើពិធីជប់លៀង និងស្រីជាងការដឹកនាំប្រទេសដែលអស់រយៈពេល ៤ ទសវត្សរ៍បានងាកទៅរកបិតារបស់ព្រះអង្គដើម្បីធ្វើជាអជ្ញាកណ្តាលដល់ជម្លោះនយោបាយ។ ចាប់តាំងពីការគ្រងរាជ្យមក ស្តេច Vajiralongkorn បានបង្ហាញថា ការគិតរបស់ពួកគេគឺខុស។ រយៈពេល ៤ ខែដំបូងនៃការគ្រងរាជ្យត្រូវបានគេមើលឃើញថា ជាព្រះមហាក្សត្រអង្គនោះមានអំណាច ពេលខ្លះថែមទាំងធ្វើការផ្ទាល់ជាងបិតារបស់ព្រះអង្គទៅទៀត។ ប៉ុន្តែ ក្នុងខណៈដែលសពស្តេច ភូមិបុល គ្រងរាជ្យដោយការផ្តល់ក្តីស្រលាញ់ពីអ្នកក្រោមបង្គាប់របស់ព្រះអង្គនោះ ស្តេច Vajiralongkorn កំពុងចាប់ផ្តើមគ្រងរាជ្យដោយការបណ្តុះភាពភ័យខ្លាច។
ស្តេច ភូមិបុល បានគ្រងរាជ្យនៅឆ្នាំ ១៩៤៦ បន្ទាប់ពីការសុគត់ដ៏អាថ៌កំបាំងរបស់ព្រះរាមព្រះអង្គ។ ស្តេចភូមិបុលដ៏ក្មេងខ្ចីនោះបានចាប់ផ្តើមធ្វើដំណើរទៅបណ្តាខេត្តដាចស្រយាល គាំទ្រព្រះសង្ឃ និងព្រះវិហារក្នុងតំបន់ទាំងនោះ និងបង្កើតគម្រោងអភិវឌ្ឍន៍នៅទូទាំងប្រទេស។ សកម្មភាពដ៏ប្រជាប្រិយទាំងនេះបានបង្កើតជាមូលដ្ឋានគ្រឹះដល់ការកសាងប្រជាប្រិយភាពរបស់ព្រះអង្គក្នុងចំណោមប្រជាជនថៃ។
របៀបដឹកនាំថ្មី
បុត្រារបស់ព្រះអង្គមិនអាចធ្វើដូចអ្វីដែលព្រះអង្គបានធ្វើនោះទេ។ ស្តេច Vajiralongkorn បានចំណាយពេលភាគច្រើនៃជីវិតរបស់ព្រះអង្គនៅក្រៅប្រទេស ដោយរីករាយនឹងរបៀបរបស់នៅដ៏ហឺហារនៅអឺរ៉ុប ហើយចាប់តាំងពីវិលត្រឡប់ទៅកាន់ប្រទេសថៃវិញ ព្រះអង្គបានបង្ហាញពីភាពគ្មានចំណាប់អារម្មណ៍នឹងពិធីបំពេញចិត្តមហាជនដែលបានបង្កើតឡើងដោយបិតាព្រះអង្គទេ។
រយៈពេល ៥ សប្តាហ៍បន្ទាប់ពីឡើងគ្រងរាជ្យមក នៅថ្ងៃទី ៩ មករា ស្តេចថ្មីនោះបានចែកសញ្ញាប័ត្រសាកលវិទ្យាល័យដល់និស្សិតនៅសាកលវិទ្យាល័យ Rajabhat University នៅទីក្រុងឈៀងម៉ៃ ជាពិធីធ្លាប់ធ្វើដោយសពស្តេចភូមិបុល។ ស្តេច Vajiralongkorn បានធ្វើឲ្យនិស្សិតទាំងនោះរង់ចាំជាង ៤ ម៉ោង។ នេះគឺជាសញ្ញាដំបូងនៃរបបដឹកនាំថ្មីរបស់ព្រះអង្គ។
នៅថ្ងៃបន្ទាប់ ស្តេច Vijiralongkorn បានទាមទារឲ្យមានការកែប្រែសេចក្តីព្រាងរដ្ឋធម្មនុញ្ញដែលបានធ្វើប្រជាមតិនៅខែសីហា ឆ្នាំ ២០១៦ ស្ថិតក្រោមរបបសឹកដែលហាមសកម្មជន និងអ្នកនយោបាយប្រឆាំងរដ្ឋធម្មនុញ្ញនោះមិនឲ្យធ្វើយុទ្ធនាការ។ សេចក្តីលម្អិតនៃការធ្វើអន្តរាគមន៍នោះនៅតែគេមិនបានដឹងក្នុងពេលការពិភាក្សាដំបូង ហើយត្រូវបានបង្ហាញដល់សាធារណជននៅបន្ទាប់ពីរដ្ឋធម្មនុញ្ញថ្មីនោះត្រូវបានប្រកាសឲ្យប្រើប្រាស់នៅថ្ងៃទី ៦ ខែមេសា នោះប៉ុណ្ណោះ។
ការផ្លាស់ប្តូរនោះបានផ្តល់ឲ្យព្រះមហាក្សត្រនូវការគ្រប់គ្រងទាំងស្រុងលើការតែងតាំងរាជានុសិទ្ធិនៅពេលអវត្តមានរបស់ព្រះអង្គ លុបចោលការតម្រូវឲ្យមានការជំទាល់ពីសភាដល់បទបញ្ជារបស់ព្រះមហាក្សត្រ និងបង្កើតឡើងវិញនូវអំណាចនៅពេលមានវិបត្តិរាជ្យបាល្ល័ង្គដែលត្រូវបានដកហូតចេញពីរាជ្យវាំងនៅក្នុងសេចក្តីព្រាងរដ្ឋធម្មនុញ្ញឆ្នាំ ២០១៦ រាប់បញ្ចូលទាំងសមត្ថភាពក្នុងការធ្វើវេតូលើនីតិប្រតិបត្តិនិងបញ្ញត្តិ និងសិទ្ធិក្នុងការរំលាយសភាធម្មនុញ្ញផងដែរ។ ជារួមទៅ ដោយមានរដ្ឋធម្មនុញ្ញថ្មី ស្តេច Vijiralongkorn នឹងមានអំណាចច្រើនទៅលើសភាជាងបិតាព្រះអង្គធ្លាប់ធ្វើទៅទៀត។
ការក្តាប់អំណាចកាន់តែណែន
ចាប់តាំងពីការឡើងគ្រងរាជ្យមក ស្តេចថ្មីនោះបានគ្រប់គ្រងកាន់តែណែនលើក្រុមមនុស្សសំខាន់ៗរបស់រាជ្យវាំង និងឥស្សរជនដ៏មានអំណាចដែលដឹកនាំក្រុមនោះស្ថិតក្រោមសពបិតារបស់ព្រះអង្គ។ នៅពេល ៤ ខែកន្លងទៅនេះ ស្តេច Vijiralongkorn បានដកហូតមន្ត្រីរាជ្យវាំងជាង ៤០ នាក់ចេញពីតួនាទីរបស់គេ ដោយមានការចោទប្រកាន់ជាផ្លូវការដែលចាប់ពីអាកប្បកិរិយាមិនសក្តិសមជាមន្ត្រីជាន់ខ្ពស់ រហូតដល់រឿងនៃការរំលោភបំពានអំណាចសម្រាប់ផលប្រយោជន៍ផ្ទាល់ខ្លួន ពីការចូលរួមក្នុងនយោបាយដែលធ្វើឲ្យខូចដល់សន្តិសុខជាតិ ការបង្ហាញពីរបាយការណ៍សុខភាពរបស់សពស្តេច ភូមិបុល រហូតដល់ធ្វើឲ្យមានការបាត់ទំនុកចិត្តរបស់ព្រះមហាក្សត្រ។
ក្នុងចំណោមអ្នកដែលត្រូវបានដកហូតចេញពីមុខតំណែងរបស់គេនៅក្នុងរាជ្យវាំងនោះគឺមានពីករណី (១) ករណីរបស់លោក Jumpol Manmai ជាអតីតអនុប្រធានប៉ូលិស និងជាប្រធានការិយាល័យកិច្ចការរាជ្យវាំងទទួលខុសត្រូវខាងសន្តិសុខនិងកិច្ចការពិសេសៗ (២) សមាជិកគ្រួសារ ៥ នាក់របស់ក្រុម Vajarodaya ជាគ្រួសារដ៏លេចធ្លោរបំផុតមួយនៅក្នុងរាជ្យវាំងស្ថិតក្រោមបិតារបស់ស្តេច Vijiralongkorn។ ក្នុងខណៈដែលសមាជិកគ្រួសារ ៥ នាក់របស់ Vajarodaya ត្រូវបានដកចេញដោយស្ងាត់ៗពីតួនាទីរបស់គេនោះ ការដកហូតអតីតអនុប្រធានប៉ូលិសនោះគឺជាកិច្ចការមានលក្ខណៈសាធារណៈខ្លាំងជាង។
លោក Jumpol ត្រូវបានបណ្តេញចេញចំពោះបទ “ប្រព្រឹត្តអំពើយ៉ាងអាក្រក់” ហើយបានបាត់ខ្លួននៅចំពេលមានពាក្យចចាមអារ៉ាមអំពីការស្លាប់របស់គាត់ ជាជោគវាសនាដែលបានកើតឡើងលើអតីតសមាជិក ២ នាក់របស់ក្រុមមនុស្សសំខាន់ៗរបស់ស្តេច Vijiralongkorn ដែលបានស្លាប់នៅក្នុងកាលៈទេសៈដ៏អាថ៌កំបាំងក្នុងពេលជាប់ឃុំ។
មួយសប្តាហ៍បន្ទាប់ពីការបាត់ខ្លួនគាត់ លោក Jumpol ត្រូវបានចោទប្រកាន់ពីបទការរំលោភដី ហើយបានលេចមុខនៅតុលាការដោយក្បាលរបស់គាត់ត្រូវបានកោសក់ចេញ ជាការដែលត្រូវតែធ្វើដល់អ្នកដែលអស់ការស្រលាញ់ពីព្រះមហាក្សត្រថ្មីនោះ។ អតីតម្ចាស់ស្ត្រី Srirasmi របស់ព្រះអង្គបានប្រឈមមុខនឹងការដាក់ទណ្ឌកម្មស្រដៀងគ្នានៅឆ្នាំ ២០១៤។ បន្ទាប់ពីលែងលះគ្នា Srirasmi ត្រូវបានដកហូតងារចេញ កោសក់ និងរក្សាឲ្យនៅដាច់ឆ្ងាយពីក្រសែភ្នែកសាធារណជន ក្នុងខណៈឪពុកម្តាយរបស់នាង និងសមាជិកគ្រួសាររបស់នាង ៤ នាក់ទៀតត្រូវបានជាប់ពន្ធនាគារពីបទបរិហារកេរ្តិ៍ព្រះមហាក្សត្រ។
ភាពភ័យខ្លាចបានរីករាលដាលនៅក្នុងចំណោមគ្រួសារលេចធ្លោរជាច្រើននៅក្នុងប្រទេសថៃ។ ប្រភពមួយជិតស្និទ្ធនឹងរាជ្យវាំងដែលសុំមិនឲ្យបញ្ចេញឈ្មោះនោះបានប្រកាសថា “មនុស្សជាច្រើនកំពុងតែមានផែនការត្រៀមខ្លួន និងកំពុងផ្ទេរប្រាក់របស់គេទៅបរទេសក្នុងករណីស្តេចនោះងាកមកធ្វើបាបពួកគេ”។
ស្តេចដែលគេភ័យខ្លាច
ការក្តាប់អំណាចកាន់តែណែនរបស់ស្តេចថ្មីនោះបានប៉ះពាល់មិនត្រឹមតែសមាជិករបស់ឥស្សរជនប៉ុណ្ណោះទេ ប៉ុន្តែថែមទាំងជនសាមញ្ញទៀតផង។ លោក Jatupat Boonpattararaksa សិស្សច្បាប់អាយុ ២៥ ឆ្នាំត្រូវបានចាប់ខ្លួននិងចោទប្រកាន់ពីបទបរិហារកេរ្តិ៍ព្រះមហាក្សត្រ រយៈពេលមួយថ្ងៃបន្ទាប់ពីស្តេច Vijiralongkorn បានឡើងគ្រងរាជ្យចំពោះការចុច like លើការបង្ហោះនៅលើហ្វេសប៊ុកអំពីជីវៈប្រវត្តិរបស់ព្រះមហាក្សត្រដែលចេញផ្សាយដោយព័ត៌មាន BBC Thailand។ រឿងក្តីនោះត្រូវបានគេមើលឃើញថា ជាសញ្ញាច្បាស់នៃការអត់ឱនតិចតួចសម្រាប់ការពិភាក្សាជាសាធារណៈណាមួយអំពីអតីតកាលរបស់ស្តេចថ្មីនោះ។
ចាប់តាំងពីការឡើងគ្រងរាជ្យមក ស្តេចថ្មីនោះបានបង្ហាញថា អំណាចអាចត្រូវបានធ្វើឡើង ទាំងដោយការពេញចិត្តនិងការបង្ខំ ការស្រលាញ់និងការភ័យខ្លាច។ ប្រសិនបើការស្រលាញ់ ដែលរារាំងដោយច្បាប់បរិហារកេរ្តិ៍ព្រះមហាក្សត្រនោះ បានកំណត់ពីការគ្រងរាជ្យរបស់បិតាព្រះអង្គនិងទាមការគោរពពីអ្នកក្រោមបង្គាប់របស់ព្រះអង្គនោះ ការភ័យខ្លាចនឹងបានកំណត់ពីការគ្រងរាជ្យរបស់បុត្រាព្រះអង្គ។ គេនៅរង់ចាំមើលថា ថាតើយុទ្ធសាស្ត្រថ្មីនោះនឹងមានដំណើរការឬអត់ ប៉ុន្តែភាពភ័យខ្លាចលើស្តេចថ្មីនោះគឺជាអ្វីមួយដែលប្រទេសថៃនឹងត្រូវតែជួបតទល់៕
ប្រភព៖ Al Jazeera
