ផ្អែកតាមលិខិតជូនដំណឹងរបស់ក្រសួងមហាផ្ទៃ កាលពីថ្ងៃទី០៥ ខែមេសា ឆ្នាំ២០១៧ ដែលបានផ្ញើទៅគណបក្សសង្គ្រោះជាតិវិញ គឺបានទទួលស្គាល់ការជ្រើសរើសលោក កឹម សុខា ជាប្រធានគណបក្សសង្គ្រោះជាតិថ្មី គឺស្របទៅនឹងលក្ខន្តិកៈថ្មីរបស់គណបក្សសង្គ្រោះជាតិដែលបានយកទៅតម្កល់នៅក្រសួងមហាផ្ទៃ។ នេះជាដំណឹងដ៏ត្រេកត្រអាលមួយសម្រាប់លោក កឹម សុខា និងក្រុមមន្ត្រីដែលស្និទ្ធនឹងលោកមកពីកូតាគណបក្សសិទ្ធិមនុស្ស។ គេអាចនិយាយបានថា «យុទ្ធសាស្ត្រច្រេះស៊ីដែក» ដែលគណបក្សសិទ្ធិមនុស្សបានប្រើប្រាស់ដើម្បីលួងលោមបញ្ចុះបញ្ចូលគណបក្ស សម រង្ស៊ី តាំងពីឆ្នាំ២០១២ ដើម្បីរួមបញ្ចូលគ្នានោះ គឺត្រូវបានគណបក្សសិទ្ធិមនុស្សស៊ីដាច់ខ្ទេចនៅត្រឹមខែ មេសា ឆ្នាំ២០១៧នេះតែម្តង។
ក្រុមអ្នកវិភាគ បានចាប់អារម្មណ៍ថា ការឡើងក្តោបក្តាប់អំណាចជាប្រធានគណបក្សរបស់លោក កឹម សុខា នៅពេលនេះ គឺជាការឡើងកាន់អំណាចដោយតក់ក្រហល់ និងមានភាពចម្រូងចម្រាស់ផ្ទៃក្នុងយ៉ាងស្រួចស្រាវ។ នៅក្នុងកិច្ចប្រជុំបោះឆ្នោតជ្រើសតាំងលោក កឹម សុខាជាថ្មី កាលពីថ្ងៃទី០២ ខែមេសា ឆ្នាំ២០១៧ ដើម្បីឱ្យស្របតាមលក្ខន្តិកៈថ្មីនោះ គេពុំឃើញមានការចូលរួមពីសមាជិកគណៈកម្មាធិការនាយកនៃគណបក្សទាំងអស់នោះទេ ម្យ៉ាងទៀតក្រុមសមាជិកដែលបានចូលរួមនោះ បានលួចត្អូញត្អែរប្រាប់គ្នីគ្នាតាមទូរស័ព្ទថា ការបោះឆ្នោតជ្រើសតាំងនោះ គឺធ្វើឡើងដើម្បីតែបង្គ្រប់កិច្ចប៉ុណ្ណោះព្រោះសមាជិកដែលចូលរួមមួយចំនួនមិនពេញចិត្តឡើយ ដោយសារតែកូតាប្រធានគណបក្សសង្គ្រោះជាតិ គឺត្រូវជ្រើសចេញពីសមាជិកដែលជាអតីតគណបក្ស សម រង្ស៊ី។
គេនៅចាំបានថា ក្រោយពេលដែលមានការបញ្ចុះបញ្ចូលឱ្យលោក សម រង្ស៊ី ធ្វើពាក្យលាលែងពីតំណែងប្រធានគណបក្សនៅថ្ងៃទី១១ ខែកុម្ភៈ ឆ្នាំ២០១៧ភ្លាម ស្រាប់តែស្អែកឡើងមួយថ្ងៃប៉ុណ្ណោះ គឺថ្ងៃទី១២ ខែ ឆ្នាំដដែល ក៏មានការកោះប្រជុំបន្ទាន់ពីលោក កឹម សុខា ឱ្យមានការយល់ព្រមលាលែងតំណែងនោះភ្លាមៗដែរ (អាចហៅបានថាជាយុទ្ធសាស្ត្រ រុញស៊ីក្លូបញ្ចូលឡាន ) ដើម្បីបានកាន់អំណាចកាន់តែឆាប់។
ដោយសារតែមានការចាញ់ប្រៀបខ្លាំងក្នុងការរៀបចំក្បាលម៉ាស៊ីនក្នុងបក្សនៅថ្នាក់ជាតិបែបនេះហើយ ទើបមានការតវ៉ាស្នើសុំរំលាយសមាសភាពក្រុមប្រឹក្សាស្រុក-ខេត្ត ដែលជាកូតាមកពីគណបក្សសិទ្ធិមនុស្ស ដោយព្រះអង្គម្ចាស់ ស៊ីសុវត្ថិ ធម្មិកោ នៅខេត្តព្រះសីហនុ ប៉ុន្តែការតវ៉ានោះត្រូវទទួលបរាជ័យទៅវិញ ដោយក្រុមអ្នកស្និទ្ធនឹងលោក កឹម សុខា បានចោទព្រះអង្គថា «កំពុងតែឆ្កួតនិងបែកឆ្វេង»។
ការទទួលបានសិទ្ធិស្របច្បាប់ជាប្រធានគណបក្ស របស់លោក កឹម សុខា នៅពេលនេះ គឺជាជំហ៊ានមួយឆ្ពោះទៅរកការក្តោបក្តាប់អំណាចនៅក្នុងបក្សបានទាំងស្រុង ហើយជាទស្សនៈស្រមើស្រម៉ៃរបស់លោក កឹម សុខា គឺគាត់នឹងក្លាយទៅជាបេក្ខភាពឈរឈ្មោះប្រកួតប្រជែងជាបេក្ខជននាយករដ្ឋមន្ត្រី នៅក្នុងការបោះឆ្នោតនៅឆ្នាំ២០១៨ ខាងមុខនេះដោយស្វ័យប្រវត្តិ ។ មានន័យថា « ជោគជ័យរបស់គណបក្សសិទ្ធិមនុស្សនៅពេលនេះ គឺជាបរាជ័យដ៏ជូរចត់របស់គណបក្ស សម រង្ស៊ី » យ៉ាងច្បាស់ក្រឡែត។
ផ្អែកតាមលទ្ធផលនេះ ក្រុមអ្នកវិភាគ បានមើលឃើញថា ក្រុមសកម្មជនដែលធ្លាប់គាំទ្រគណបក្សសង្គ្រោះជាតិ បានបាត់បង់ទឹកចិត្តនិងសេចក្តីក្លាហានដែលពួកគេធ្លាប់គាំទ្រគណបក្ស សម រង្ស៊ី និងជាពិសេសគឺពួកគេធ្លាប់ចាត់ទុកលោក សម រង្ស៊ី ជាប្រធានរបស់គេនោះ គឺបានរលាយសាបសូន្យទៅហើយ។ បន្ថែមលើនេះទៀត វិបត្តិនៃក្បាលម៉ាស៊ីនដឹកនាំបក្សនាពេលនេះ បានធ្វើឱ្យជោគវាសនារបស់គណបក្សប្រឆាំងស្ថិតក្នុងស្ថានភាពមិនប្រាកដប្រជាថា តើមានសុពលភាពជាគណបក្សស្របច្បាប់ឬយ៉ាងណា សម្រាប់ការចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី០៤ ខែមិថុនា ឆ្នាំ២០១៧ នេះ ដោយហេតុថា បានអនុវត្តខុសនឹងលក្ខន្តិកៈគណបក្សម្តងហើយម្តងទៀតក្នុងការជ្រើសរើសអនុប្រធានកន្លងមក។
ទោះជាយ៉ាងណា «យុទ្ធសាស្ត្រកង្កែបលេបពស់» ឬនិយាយឱ្យចំគឺបក្សដែលមានតែ៣កៅអី អាចគ្រប់គ្រងលើបក្ស ២៦កៅអី នៅពេលនេះគឺបានសម្រេចជាស្ថាពរហើយ។ ប៉ុន្តែអ្វីដែលបន្សល់ទុកនោះ គឺការឈឺចាប់របស់សកម្មជនគណបក្ស សម រង្ស៊ី ដែលខិតខំតស៊ូជាយូរមកហើយ និងមានកម្លាំងច្រើនជាងគណបក្សសិទ្ធិមនុស្ស បែរជាត្រូវមកស្តាប់តាមការដឹកនាំរបស់បក្សសិទ្ធិមនុស្សទៅវិញ ហើយដែលកន្លងមក លោកប្រធានតែងតែហៅថាជា «បក្ស កំប៉ិកកំប៉ុក ជាបក្សតូចតាច» នោះ៕
ដោយ៖ ពង្ស សុភក្ត្រា
