ក្រោយពីការបែកធ្លាយឯកសារផ្ទៃក្នុងដែលធ្វើឱ្យព្រះអង្គម្ចាស់ ធម្មិកោ មិនសប្បាយព្រះទ័យក្នុងការបង្ហោះផ្សាយនូវ សារលិខិតរបស់ព្រះអង្គផ្ញើជូនទៅកាន់ប្រធានគណបក្សសង្រ្គោះជាតិលោក កឹម សុខា កម្មវត្ថុ ស្តីពីការរុះរើគណៈកម្មាធិការស្រុក និងខេត្តព្រះសីហនុ ជាសាធារណៈ ដែលបង្ហោះលើប្រព័ន្ធសង្គម នឹងបានចុះផ្សាយដោយភ្នំពេញ ប៉ុស្តិ នៅថ្ងៃច័ន្ទ ទី២៧ ខែមីនា ឆ្នាំ២០១៧ កន្លងទៅនេះ ស្រាប់តែនៅថ្ងៃទី ០៤ មេសា នេះ ក៏មានការបង្ហោះនូវរឿងទំនាស់រវាងសកម្មជនយុវជនគណបក្ស សុភ័ណ្ឌ ឡារី និង អង្គម្ចាស់ ធម្មិកោ ដែលជារឿងថ្មីមួយទៀត ហើយសុទ្ធសឹងជាបុគ្គលដែលមានឥទ្ធិពលក្នុងគណបក្ស អំពីរឿងរ៉ាវទំនាស់ផលប្រយោជន៍នៃប្រាក់មូលនិធិដែលប្រមូលបានពីបរទេសដោយ សុភ័ណ្ឌ ឡារី និងភាពបក្ខពួកនិយមរបស់ អង្គម្ចាស់ ធម្មិកោ។ ដោយឈរលើហេតុផលទាំងពីរនេះ យើងអាចទស្សន៏ទាយ និងវិភាគឃើញយ៉ាងច្បាស់នូវជោគវាសនាអនាគត របស់គណបក្សសង្រ្គោះជាតិដូចខាងក្រោម៖
១. ឆ្លុះបញ្ចាំងពីការរង្គោះរង្គើផ្ទៃក្នុងរបស់គណបក្សប្រឆាំងយ៉ាងធ្ងន់ធ្ងរ ដោយសារតែគ្មានសាមគ្គីភាពផ្ទៃក្នុង ឈ្លោះប្រកែកគ្នា បរិហារគ្នា លាបពណ៌គ្នា កេងចំណេញប្រយោជន៍គ្នា ដោយគិតតែពីប្រឹងស្រវ៉ាយកអំណាចតែរៀងៗខ្លួន មិនចែករំលែកអោយមកអ្នកដទៃ។ ការបែកបាក់ផ្ទៃក្នុងនេះទៀតសោត វាមិនត្រឹមតែបក្សសង្គ្រោះជាតិកំពុងមានការបែកបាក់ផ្ទៃក្នុងយ៉ាងធ្ងន់ធ្ងរនៅថ្នាក់ជាតិនោះទេ សូម្បីតែថ្នាក់ក្រោមក៏មានជម្លោះដណ្តើមតំណែងបេក្ខជនឈរឈ្មោះតាមលំដាប់លេខរៀងរបស់ក្រុមប្រឹក្សាឃុំ សង្កាត់ថែមទៀត។ ដើមចមទាំងនេះហើយ ដែលជាហេតុធ្វើឱ្យថ្នាក់លើមានជម្លោះជាមួយថ្នាក់ក្រោម ថ្នាក់លើមានជម្លោះជាមួយសកម្មជនបក្ស និងយុវជនបក្សក៏មានជម្លោះជាមួយយុវជនបក្សផងដែរ។
២. ការប្រើប្រាស់បក្សពួករបស់ខ្លួនទាំងនៅថ្នាក់ជាតិ និងថ្នាក់ក្រោមជាតិ ដែលអង្គម្ចាស់កំពុងតែទាមទារ ដើម្បីដាក់បញ្ចូលបក្ខពួកខ្លួន នៅមណ្ឌលដែលខ្លួនជាបេក្ខជនតំណាងរាស្ត្រ វាជាកម្មវត្ថុក្នុងគោលបំណងបម្រើផលប្រយោជន៏ខ្លួន និងបក្ខពួកខ្លួន ជាជាងផលប្រយោជន៏របស់រាស្ត្រនៅមូលដ្ឋាន ដែលរឿងនេះហើយបានធ្វើឱ្យសកម្មជន សុភ័ណ្ឌ ឡារី មិនសប្បាយចិត្តក្នុងការទាមទារអំណាចរបស់អង្គម្ចាស់ ក៏ទម្លាយនូវចេតនារបស់អង្គម្ចាស់ ធម្មិកោ ពីមហិច្ឆិតាចង់លេបត្របាក់យកមូលដ្ឋានគ្រឹះនៅទីតាំងឈរជើងរបស់ខ្លួនជាសាធារណៈ ឱ្យប្រជាមតិយល់កាន់តែច្បាស់ក្រឡែតនូវសារលិខិតរបស់អង្គម្ចាស់ កាលពីប៉ុន្មានថ្ងៃមុន ថាជាចេតនាពិតប្រាកដក្នុងការទាមទារតំណែងផ្តល់ជូនក្រុមរបស់ខ្លួន។
៣. ការសាបរលាបនៃក្តីសង្ឃឹម និងការជឿជាក់របស់សកម្មជននៅមូលដ្ឋាន មកលើគណបក្ស ក៏នឹងត្រូវបរាជ័យ ក្នុងកំឡុងពេលដែលសកម្មជនរបស់គណបក្ស កំពុងរំពឹងយ៉ាងខ្លាំងទៅលើថ្នាក់ដឹកនាំខ្លួន តែបែរជាមានការលេចឮជាបន្ដបន្ទាប់នូវការបែកបាក់ផ្ទៃក្នុងយ៉ាងស្រួចស្រាវ ការបែកធ្លាយរឿងអាស្រូវផ្លូវភេទក្នុងចំណោមថ្នាក់ដឹកនាំកំពូលៗ ការយកលុយរបស់បេក្ខជនក្រុមប្រឹក្សាឃុំ សង្កាត់ ការលើកតម្លៃតែមនុស្សម្នាក់ក្នុងបក្ស ការបែងចែកក្រុមតាមកូតាបក្ស ដោយមេដឹកនាំ និងភាពគ្មានទំនួលខុសត្រូវ លើសកម្មជនរបស់ខ្លួនដែលខំប្ដូរផ្ដាច់ស្រលាញ់បក្ស ហ៊ានលះបង់ធនធាន ញើសឈាមខំដើរឃោសនា ទាំងងងឹតងងល់កន្លងមក។
៤. បញ្ហាជាប់រុំរឹតដោយទោសទណ្ឌ ទាំងថ្នាក់លើ និងទាំងថ្នាក់មូលដ្ឋាន ពីការប្រឈមនឹងច្បាប់ ដោយសារតែការប្រព្រឹត្តិ ទោសព្រហ្មទណ្ឌដែលច្បាប់មិនអាចអត់ឱនឱ្យបាន។ ទន្ទឹមនឹងវិបត្តិក្បាលម៉ាស៊ីនដឹកនាំ ដែលបានធ្វើសមាជវិសាមញ្ញផ្ទុយទៅនឹងលក្ខន្តិកៈបក្ស ដោយសារតែភាពទន់ខ្សោយនៃធនធានមនុស្សខាងផ្នែកច្បាប់ បានធ្វើឱ្យមានការអនុវត្តផ្ទុយពីលក្ខន្តិកៈម្តងហើយម្តងទៀត។ ភាពមិនយល់ច្បាស់ពីនីតិវិធីក្នុងការធ្វើវិសោធនៈកម្មលក្ខន្តិកៈផ្ទៃក្នុងរបស់ខ្លួននេះ វាជាហេតុអាចធ្វើឱ្យបេក្ខជនក្រុមប្រឹក្សាឃុំ សង្កាត់ មិនមានសុពលភាពក្នុងផ្លូវច្បាប់ ជាការបញ្ជាក់ពីកំសោយនៃក្របខណ្ឌច្បាប់របស់មេដឹកនាំបក្ស និងការដើរចេញរបស់សមាជិក សមាជិកាបក្សដោយសារអស់ជំនឿចិត្តក្នុងការដឹកនាំបែបប្រជាភិថុតិរបស់ថ្នាក់ដឹកនាំខ្លួន ដែលជាហេតុនាំមកនូវភាពបរាជ័យក្នុងការបោះឆ្នោតនាពេលខាងមុខ របស់បក្សសង្គ្រោះជាតិ យ៉ាងពិតប្រាកដ។
ដូចនេះ ការដណ្តើមអំណាច បក្ខពួកនិយម គ្រួសារនិយម និងមូលនិធិជំនួយនានានេះហើយ គឺជាដើមហេតុនៃទំនាស់ផលប្រយោជន៍នៅក្នុងបក្សប្រឆាំង ដែលនៅទីបំផុតបាននាំទៅដល់វិបត្តិបែកបាក់ផ្ទៃក្នុងគណបក្ស ហើយវាជាវិនាសកម្មនាំមកនូវមហន្តរាយរបស់បក្សសង្គ្រោះជាតិ ឈានឆ្ពោះទៅរកជ្រោះមរណៈ នាពេលឆាប់ៗខាងមុខនេះជាក់ជាមិនខាន៕
ដោយ៖ ហួរ សុវឌ្ឍនា
និស្សិតឆ្នាំទី២ រាជបណ្ឌិត្យសភាកម្ពុជា
