ទស្សនៈ៖ សប្តាហ៍ដ៏មោទនភាពសម្រាប់កម្ពុជា ក្នុងនាមជាប្រធានអាស៊ាន

ថ្ងៃអង្គារ ទី ២ សីហា ២០២២​
13

(ភ្នំពេញ)៖ សប្តាហ៍ដំបូងនៃខែសីហា ឆ្នាំ២០២២នេះ ក្នុងនាមជាប្រធានអាស៊ាន កម្ពុជានឹងរៀបចំការប្រជុំរដ្ឋមន្ត្រីការបរទេសរបស់អាស៊ាន និងកិច្ចប្រជុំពាក់ព័ន្ធជាច្រើនទៀត។ ពិធីបើកកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នឹងប្រព្រឹត្តទៅនៅថ្ងៃទី០៣ ខែសីហា ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន។

កិច្ចប្រជុំរដ្ឋមន្ត្រីការបរទេសអាស៊ាន ដែលបង្កើតឡើងកាលពីឆ្នាំ១៩៦៧ គឺចាកិច្ចប្រជុំដ៏ធំ និងមានសារសំខាន់មួយបន្ទាប់ពីកិច្ចប្រជុំកំពូលអាស៊ាន។ កិច្ចប្រជុំរដ្ឋមន្ត្រីការបរទេសអាស៊ាន ជាកិច្ចប្រជុំដើម្បីត្រួសត្រាយផ្លូវ និងដាក់ចេញនូវសេចក្តីសម្រេចចិត្តនានា ជូនប្រមុខដឹកនាំអាស៊ានក្នុងកិច្ចប្រជុំកំពូលដែលធ្វើឡើងនៅចុងឆ្នាំ។

យោងតាមក្រសួងការបរទេសកម្ពុជា បានឱ្យដឹងថា កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ រួមមាន៖ កិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ, ជំនួបរវាងរដ្ឋមន្ត្រីការបរទេសអាស៊ានជាមួយតំណាងគណៈកម្មការអន្តររដ្ឋាភិបាលអាស៊ាន ស្តីពីសិទ្ធិមនុស្ស, កិច្ចប្រជុំរដ្ឋមន្ត្រីការបរទេសអាស៊ានលើកទី៥៥, សន្និសីទក្រោយកិច្ចប្រជុំរដ្ឋមន្ត្រីការបរទេសអាស៊ាន ជាមួយដៃគូសន្ទនារបស់អាស៊ាន, កិច្ចប្រជុំរដ្ឋមន្ត្រីការបរទេសអាស៊ានបូកបី លើកទី២៣, កិច្ចប្រជុំរដ្ឋមន្រ្តីការបរទេសនៃកិច្ចប្រជុំកំពូលអាស៊ី-បូព៌ា លើកទី១២ និងកិច្ចប្រជុំវេទិកាតំបន់អាស៊ានលើកទី២៩។

ស្របពេលជាមួយកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ រដ្ឋមន្ត្រីការបរទេស និងអគ្គលេខាធិការអាស៊ាន នឹងអញ្ជើញធ្វើជាសាក្សីចុះហត្ថលេខាលើលិខិតុបករណ៍នៃការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ដោយព្រះរាជាណាចក្រដាណឺម៉ាក, សាធារណរដ្ឋក្រិក, ព្រះរាជាណាចក្រហូឡង់, ប្រទេសអូម៉ង់, រដ្ឋកាតា និងអារ៉ាប់រួមអេមីរ៉ាត់។ រដ្ឋមន្ត្រីការបរទេស និងអគ្គលេខាធិការអាស៊ាន ក៏នឹងអញ្ជើញចូលរួមក្នុងកម្មវិធីប្រគល់ពានរង្វាន់អាស៊ានឆ្នាំ២០២១ផងដែរ។

ក្នុងឱកាសនៃកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នឹងមានកិច្ចប្រជុំត្រីភាគីចំនួនបីដាច់ដោយឡែកពីគ្នា រវាងកម្ពុជា និងលេខាធិការដ្ឋានអាស៊ាន ជាមួយនឹងប្រទេសដៃគូសន្ទនារបស់អាស៊ានចំនួនបី រួមមាន៖ ប្រទេសន័រវេស ប្រទេសតួកគី និងប្រទេសស្វីស។

ក្រោយក្លាយជាសមាជិករបស់អាស៊ាននៅឆ្នាំ១៩៩៩ កម្ពុជាធ្លាប់បានធ្វើជាប្រធានអាស៊ាន ហើយរៀបចំកិច្ចប្រជុំដ៏មានសារៈសំខាន់នៅតំបន់អាស៊ីអាគ្នេយ៍នេះចំនួនពីរលើកមកហើយនៅឆ្នាំ២០០២ និងឆ្នាំ២០២២។ តែសម្រាប់ឆ្នាំ២០២២ពីរនេះ ភាពជាប្រធានអាស៊ានរបស់កម្ពុជា ទទួលបានការចាប់អារម្មណ៍ខ្លាំង និងមានការចូលរួមច្រើនជាងពីរលើកកន្លងទៅ។

យោងតាមក្រសួងការបរទេសកម្ពុជា បានឱ្យដឹងថា មានរដ្ឋមន្ត្រីការបរទេសអាស៊ាន រដ្ឋមន្ត្រីការបរទេស និងតំណាងប្រទេសដៃគូរបស់អាស៊ានរហូតដល់ទៅប្រមាណ៣៨ប្រទេស នឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធនៅកម្ពុជា។ ក្នុងនោះរដ្ឋមន្ត្រីការបរទេសប្រទេសមហាអំណាចលើពិភពលោករួមមានអាមេរិក ចិន រុស្ស៉ី ជប៉ុន និងអូស្ត្រាលីជាដើម សុទ្ធតែបានបញ្ជាក់រួចហើយនឹងអញ្ជើញចូលរួមកិច្ចប្រជុំធ្វើឡើងនៅកម្ពុជា។

វេទិកានៃជំនួបដ៏សែនមហោឡារិក និងជួបដោយផ្ទាល់បែបនេះ បានខកខានអស់រយៈពេលពីរឆ្នាំមកហើយ (២០២០-២០២១) ដោយសារតែរាតត្បាតនៃជំងឺកូវីដ១៩។ កិច្ចប្រជុំរបស់អាស៊ាន និងកិច្ចប្រជុំពាក់ព័ន្ធពីរឆ្នាំកន្លងទៅនេះ បានធ្វើឡើងត្រឹមតែតាមអនឡាញប៉ុណ្ណោះ។

ជាក្តីអំណររីករាយជាពន់ពេកសម្រាប់កម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដាក់ចេញនូវផែនការមួយដ៏ច្បាស់លាស់ និងមានប្រសិទ្ធភាពក្នុងការប្រយុទ្ធប្រឆាំងនឹងជំងឺកូវីដ១៩ ធ្វើឱ្យកម្ពុជាក្លាយជាដែនដីមានសុវត្ថិភាពពីជំងឺកូវីដ១៩។ សុវត្ថិភាពពីការរីករាតត្បាតជំងឺកូវីដ១៩នេះ បានបើកផ្លូវឱ្យកម្ពុជាអាចរៀបចំនូវកិច្ចប្រជុំរបស់អាស៊ាន និងកិច្ចប្រជុំពាក់ព័ន្ធដោយផ្ទាល់។ នេះជាវេទិកាជួបជុំឡើងវិញលើកដំបូងសម្រាបប្រទេសសមាជិកអាស៊ាន និងប្រទេសដៃគូ ក្រោយពីការរាតត្បាតជំងឺកូវីដ១៩។ តាមរយៈវេទិកានេះ នឹងជួយផ្សព្វផ្សាយថាជាដែនដីមានសុវត្ថិភាពពីជំងឺកូវីដ១៩ ទៅកាន់បណ្តាជាតិសាសន៍នានាលើពិភពលោកផងដែរ។

កិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធនាពេលនេះ គឺជាកិច្ចប្រជុំដ៏ធំមួយ។ ដើម្បីធានាថាកិច្ចប្រជុំនេះអាចប្រព្រឹត្តទៅបានជោគជ័យ និងល្អប្រសើរតាមការគ្រោងទុក្ខនោះ មន្ត្រីក្រសួងការបរទេសកម្ពុជា មន្ត្រីក្រសួងព័ត៌មាន និងក្រសួងពាក់ព័ន្ធ បានស្រាក់ដៃគ្នាប្រឹងប្រែងអស់កម្លាំងកាយចិត្តក្នុងការរៀបចំកន្លែងប្រជុំ ការបដិសណ្ឋារកិច្ចចំពោះភ្ញៀវ និងក្រុមអ្នកព័ត៌មានផងដែរ។ ដោយឡែកកម្លាំងនគរបាល កម្លាំងកងរាជអាវុធ និងកម្លាំងសន្តិសុខដទៃទៀត ក៏បានរៀបចំពង្រាយក្នុងការរក្សាសន្តិសុខ និងសម្រួលចរាចរណ៍សម្រាប់គណៈប្រតិភូប្រទេសជាភ្ញៀវ ដែលអញ្ជើញចូលរួមក្នុងកិច្ចប្រជុំនេះ។

មន្ត្រីដែលមានតួនាទីភារកិច្ចក្នុងកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធនេះ ម្នាក់ៗមានភាពមមាញឹកខ្លាំងមែនទែន ហើយប្រកបដោយការទទួលខុសត្រូវខ្ពស់បំផុត។

កម្ពុជាជាប្រទេសដែលធ្លាប់តែញ៉ាំញីដោយភ្លើងសង្គ្រាម។ ភ្លើងសង្គ្រាមនេះ បានធ្វើឱ្យកម្ពុជាបាត់បង់នូវសមត្ថភាពទាំងឡាយ កុំថាឡើយសមត្ថភាពម្ចាស់ការលើការរៀបចំកិច្ចប្រជុំសំខាន់ សូម្បីតែការចូលរួមក្នុងវេទិកានានា ក៏កម្ពុជាមិនអាចធ្វើបាននោះដែរ។

ផ្ទុយទៅវិញសម្រាប់ពេលបច្ចុប្បន្នម្លប់សុខសន្តិភាពបានផ្តល់ឱកាសឱ្យកម្ពុជាកសាងសមត្ថភាពគ្រប់បែបយ៉ាងសេដ្ឋកិច្ច ធនធានមនុស្ស និងតួនាទីរបស់ខ្លួន។ ជាក់ស្តែងដូចពេលនេះ កម្ពុជា មានសមត្ថភាពទទួលរៀបចំកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ ហើយកម្ពុជាក៏មានសមត្ថភាពដឹកនាំកិច្ចប្រជុំ ដើម្បីដោះស្រាយបញ្ហា និងដាក់ចេញនូវចក្ខុវិស័យសម្រាប់វិបុលភាពនៅក្នុងតំបន់ និងលើពិភពលោកថែមទៀតផង។

ទាំងនេះ គឺជាកិត្តិយសដ៏ឧត្តុង្គឧត្តម ហើយក៏ជាមោទនភាពមួយក្រៃលែងសម្រាប់ប្រជាជាតិកម្ពុជាទាំងមូល។ សូមប្រជាពលរដ្ឋខ្មែរគ្រប់រូបចូលរួមត្រេកអរ និងសាទរ ចំពោះការធ្វើជាប្រធានអាស៊ាន ហើយជាអ្នកដឹកនាំកិច្ចប្រជុំថ្នាក់តំបន់ និងពិភពលោកដ៏មានសារៈសំខាន់នាពេលនេះ ហើយត្រូវចូលរួមបង្កបរិយាកាសល្អប្រសើរ ដើម្បីលើកកម្ពស់មុខមាត់ និងកិត្តិយសរបស់ជាតិកម្ពុជា៕

ដោយ៖ FN – វ៉ាន់ សារាយ

ចែករំលែក

បញ្ចេញយោបល់