លោកទេសរដ្ឋមន្រ្តី គន់ គីម ៖ ពង្រឹងសមត្ថភាពដោយបង្កើនប្រសិទ្ធភាពការងារក្នុងការជួយសង្គ្រោះអាយុជីវិតមនុស្សជាអាទិភាព

ថ្ងៃអង្គារ ទី ២៦ មករា ២០២១​
11

ព្រះវិហារ៖ នៅព្រឹកថ្ងៃទី២៦ ខែមករា ឆ្នាំ២០២១ គណៈ កម្មាធិការគ្រប់គ្រងគ្រោះមហន្តរាយខេត្តព្រះវិហារ បានបើកកិច្ចប្រជុំត្រួតពិនិត្យការងារឆ្នាំ២០២០ និងលើកទិសដៅបន្តឆ្នាំ២០២១ របស់ខ្លួន ក្រោមអធិបតីភាពលោកទេសរដ្ឋមន្រ្តី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ ដោយមានការចូលរួមពីលោក ប្រាក់ សុវណ្ណ អភិបាលនៃគណៈអភិបាលខេត្តព្រះវិហារ ប្រតិគណៈកម្មាធិការ គ្រប់គ្រងគ្រោះមហន្តរាយន្ត មេបញ្ជាការភូមិភាគ៤ អភិបាលរងខេត្ត មន្ត្រីរាជការ តាមមន្ទីរ ស្ថាប័នពាក់ព័ន្ធ កម្លាំងប្រដាប់អាវុធ និងអាជ្ញាធរក្រុងស្រុកឃុំសង្កាត់ទូទាំងខេត្ត នៅបញ្ជាការតំបន់ប្រតិបត្តិការសឹករងខេត្តព្រះវិហារ ។

លោក ប្រាក់ សុវណ្ណ អភិបាលខេត្តបានជម្រាបជូនបញ្ហាជួបប្រទះនិងគ្រោះមហន្តរាយធម្មជាតិឆ្នាំ២០២០ កន្លងទៅខេត្តព្រះវិហារមួយចំនួនដូចជា ជំនន់ទឹកភ្លៀងបានធ្វើឱ្យប៉ះពាល់ផ្ទះប្រជាពលរដ្ឋចំនួន៤១៨ខ្នងផ្ទះ ស្មើនឹង៤៣៨គ្រួសារ, ប៉ះពាល់លើដីស្រែចម្ការ ចំនួន ៣,៧១៤ហិកតា ស្មើនឹង ២,៤៣៦គ្រួសារ, ផ្ទៃដីខូចខាតសរុប ១,៤៨៤ហិកតា ស្មើនឹង១,៣១៧គ្រួសារ។

– ខ្យល់កន្ទ្រាក់ កើតឡើងចំនួន១៤លើក ប៉ះពាល់ ៥០៩ គ្រួសារ។
– រន្ទះបាញ់ កើតឡើងចំនួន ១១ បណ្តាលឱ្យរបួសចំនួន៣ នាក់ និងស្លាប់ចំនួន៥នាក់។

ជាការឆ្លើយតប គណៈកម្មាធិការគ្រប់គ្រងគ្រោះម ហន្តរាយខេត្ត ដោយមានការគាំទ្រពីគណៈកម្មាធិការជាតិគ្រប់គ្រងគ្រោះមហន្តរាយ សប្បុរសជននានា ព្រមទាំងមានកិច្ចសហការជាមួយសាខាកាកបាទក្រហមខេត្ត និងកាកបាទក្រហមកម្ពុជាបានចុះសួរសុខទុក្ខ និងចែកពូជស្រូវដែលជាអំណោយ របស់លោកនាយករដ្ឋមន្ត្រី ហ៊ុន សែន និងភរិយា ដល់គ្រួសាររងគ្រោះដោយគ្រោះមហន្តរាយបានទាន់ពេលវាលាផងដែរ។

លោកទេសរដ្ឋមន្ដ្រី គន់ គីម បានណែនាំគណៈកម្មាធិការគ្រប់គ្រងគ្រោះមហន្តរាយគ្រប់ថ្នាក់ ត្រូវយកចិត្តទុកដាក់លើការងារប្រមូលព័ត៌មានពីគ្រោះមហន្តរាយឲ្យបានលឿន ត្រូវធ្វើផែនការត្រៀម បង្ការជាមុន និងឆ្លើយតបឲ្យបានទាន់ពេលវេលា ដោយប្រើកម្លាំងសរុបមធ្យោបាយសរុប ផ្តោតសំខាន់លើការសង្គ្រោះ អាយុជីវិតមនុស្សជាអាទិភាព ដើម្បីធ្វើបានដូចខាងលើសមត្ថកិច្ចគ្រប់ថ្នាក់ ត្រូវពង្រឹងសមត្ថភាពរបស់មន្ត្រី ដើម្បីមានគ្រប់លក្ខណៈសម្បត្តិ ក្នុងការឆ្លើយតបបានទៅគ្រប់សភាពការណ៍ដែលកើតឡើង៕

ចែករំលែក

បញ្ចេញយោបល់