កិច្ចប្រជុំឆ្លងសេចក្ដីព្រាងរបាយការណ៍ស្ដីពីលទ្ធផលសកម្មភាពប្រចាំខែមករា ឆ្នាំ២០២១ និងលើកទិសដៅអនុវត្តបន្ដ របស់រដ្ឋបាលខេត្តកំពង់ឆ្នាំង

ថ្ងៃអង្គារ ទី ២៦ មករា ២០២១​
7

កំពង់ឆ្នាំង៖ នៅព្រឹកថ្ងៃទី២៦ ខែមករា ឆ្នាំ២០២១ នៅសាលប្រជុំសាលាខេត្តកំពង់ឆ្នាំង លោក អម សុភា អភិបាលរងខេត្ត បានដឹកនាំកិច្ចប្រជុំឆ្លងសេចក្ដីព្រាង របាយការណ៍ ស្ដីពីលទ្ធផលសកម្មភាពប្រចាំខែមករា ឆ្នាំ២០២១ និងលើកទិសដៅអនុវត្តបន្ដ របស់រដ្ឋបាលខេត្ត ដោយមានការអញ្ជើញចូលរួមពីនាយករងរដ្ឋបាលសាលាខេត្ត កងកម្លាំងទាំងបី មន្ទីរអង្គភាពជុំវិញខេត្ត ទីចាត់ការ អង្គភាពចំណុះសាលាខេត្ត និងមន្ត្រីពាក់ព័ន្ធ។

បន្ទាប់ពី លោក លៀង ជុំសុបិន្ត នាយករងរដ្ឋបាលសាលាខេត្តកំពង់ឆ្នាំង អានសេចក្ដីព្រាងរបាយការណ៍ប្រចាំខែរួចមក លោក អម សុភា អភិបាលរងខេត្ត បានស្នើឲ្យលោក លោកស្រីប្រធាន អនុប្រធាន ឬតំណាងមន្ទីរ អង្គភាពជុំវិញខេត្ត ពិនិត្យរបាយការណ៍តាមវិស័យរបស់ខ្លួនដើម្បីធានាថារាល់ខ្លឹមសារ ឬសកម្មភាពនានាដែលបានដាក់បញ្ចូលក្នុងរបាយការណ៍នោះមានភាពត្រឹមត្រូវ ឬក៏មានភាពខ្វះចន្លោះត្រង់ចំណុចណា ដែលត្រូវបំពេញ កែសម្រួលបន្ថែមមុននឹងដាក់អនុម័តក្នុងកិច្ចប្រជុំសាមញ្ញរបស់ក្រុមប្រឹក្សាខេត្តនាពេលខាងមុខនេះ។

លោក អម សុភា អភិបាលរងខេត្ត ក៏បានថ្លែងនូវការកោតសរសើរ និងវាយតម្លៃខ្ពស់ចំពោះ ការចូលរួម និងផ្ដល់យោបល់កែសម្រួលខ្លឹមសាររបាយការណ៍យ៉ាងផុលផុសព្រមទាំងបានកោតសរសើរចំពោះដឹកនាំទីចាត់ការអន្តរវិស័យរបស់រដ្ឋបាលខេត្ត ថ្នាក់ដឹកនាំអង្គភាពជុំវិញខេត្ត បានអនុវត្តតាមតួនាទីភារកិច្ចរបស់សម្រេចបានលទ្ធផលល្អ បង្កើនការអភិវឌ្ឍ ឆ្ពោះទៅមូលដ្ឋាន និងបានចូលរួមចំណែកយ៉ាងសកម្មជាមួយរាជរដ្ឋាភិបាលក្នុងការលើកកំពស់ជីវភាពរស់នៅរបស់ប្រជាពលរដ្ឋនៅមូលដ្ឋាន។

លោកអភិបាលរងខេត្ត បានផ្តាំផ្ញើអោយគ្រប់អង្គភាពជុំវិញខេត្ត ដើម្បីសម្រេចបាននូវសូចនាករមួយប្រកបដោយប្រសិទ្ធភាពខ្ពស់ ត្រូវប្រតិបត្តិតាមតួនាទី ភារកិច្ចរបស់ខ្លួនដោយមាន ផែនការសកម្មភាពការងារច្បាស់លាស់ស្របតាមគោលនយោបាយយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលដែលមានលោកនាយករដ្ឋមន្រ្តី ហ៊ុន សែនជាប្រមុខជាពិសេសត្រូវបន្តយកចិត្តទុកដាក់ចូលរួមផ្សព្វផ្សាយ អប់រំអំពីវិធានការ ការពារការរីករាលដាលជំងឺកូវីដ-១៩ អោយប្រជាពលរដ្ឋបានយល់ជ្រួតជ្រាបស្របតាមការណែនាំរបស់ក្រសួងសុខាភិបាលបានកំណត់៕

ចែករំលែក

បញ្ចេញយោបល់