អភិបាលខេត្តត្បូងឃ្មុំ នាំយកអំណោយទៅចែកជូនពលរដ្ឋ៣៤គ្រួសារដែលទឹកជន់លិចចូលផ្ទះ

ថ្ងៃអាទិត្យ ទី ៨ កញ្ញា ២០១៩​
15

(ត្បូងឃ្មុំ)៖ គ្រាដែលទឹកជំនន់ទន្លេមេគង្គនៅខេត្តត្បូងឃ្មុំ បន្តហក់ឡើងលើសកម្រិតប្រកាសអាសន្ន ដែលបណ្ដាលឱ្យប៉ះពាល់ដល់ស្រុកចំនួន៣ ក្នុងនោះមានស្រុកក្រូចឆ្មារ និងស្រុកត្បូងឃ្មុំ បានរងផលប៉ះពាល់ខ្លាំងជាងគេ ជាង១ពាន់គ្រួសារ។

ចំណែកឯ ស្រុកអូរាំងឪ ក៏បានទទួលរងផលប៉ះពាល់ទឹកជន់លិចចូលផ្ទះប្រជាពលរដ្ឋចំនួន៣៤គ្រួសារ នៅក្នុងភូមិចំនួន២ ក្នុងឃុំមៀន ស្រុកអូរាំងឪ ខេត្តត្បូងឃ្មុំ ។ 

ក្រោយទទួលដំណឹងភ្លាមៗ លោក​ ជាម ច័ន្ទសោភ័ណ អភិបាលខេត្តត្បូងឃ្មុំ និងជាប្រធានគណៈកម្មាធិការសាខាកាកបាទក្រហមខេត្ត និងលោកស្រី​ រួមជាមួយសហការី និងអាជ្ញាធរស្រុក បានចុះទៅមើលស្ថានភាពទឹកជំនន់ជន់លិចព្រមទាំងសំណេះសំណាល ក៍ដូចជានាំយកអំណោយសាខាកាកបាទក្រហមខេត្តទៅផ្ដល់ជូនបងប្អូនទាំង៣៤គ្រួសារ ដើម្បីជួយសម្រួលតម្រូវការចាំបាច់ជាក់ស្ដែង។

នាឱកាសនោះ លោក ជាម ច័ន្ទ សោភ័ណ បានអំពាវនាវឲ្យបងប្អូនប្រជាពលរដ្ឋ ត្រូវបង្កេីនការប្រុងប្រយ័ត្នខ្ពស់ ត្រូវថែរក្សាសុខភាពរបស់ខ្លួនអោយជៀសផុតពីជំងឺផ្សេងៗ ដែលបណ្តាលមកពីការខ្វះអនាម័យ ជាពិសេសត្រូវប្រយ័ត្នក្មេងតូចៗ និងមនុស្សចាស់ ដែលគ្រោះថ្នាក់ដោយសារលង់ទឹក ។

មួយវិញទៀត ត្រូវប្រុងប្រយ័ត្នចំពោះសត្វអសិរពិស បើសិនមានតិច ឬខាំ ត្រូវបញ្ជូនទៅមណ្ឌលសុខភាព ឬក្រុមគ្រូពេទ្យ នៅជិតបំផុត ដោយរដ្ឋបាលខេត្តបានរៀបចំនៅតាមទីតាំងទីទួលសុវត្ថិភាពពេញ ២៤ម៉ោង។

លោកអភិបាលខេត្ត ក៏បានផ្តាំផ្ញើដល់អាជា្ញធរស្រុក ត្រូវយកចិត្តទុកដាក់ខ្ពស់ទៅលើសុខទុក្ខរបស់បងប្អូនប្រជាពលរដ្ឋ ។

បើតាមលោក រស់ សុខន នាយកសាខាកាកបាទក្រហមខេត្តត្បូងឃ្មុំ ឲ្យដឹងថា អំណោយចែកជូននៅពេលនោះ ក្នុងមួយមួយគ្រួសារៗទទួលបាន គ្រឿងឧបភោគបរិភោគ និងថវិការ៣មុឺនរៀលផងដែរ។

គិតត្រឹមម៉ោង៧ ព្រឹកថ្ងៃទី៨ ខែកញ្ញា ឆ្នាំ ២០១៩ កំពស់ទឹកទន្លេមេគង្គខេត្តត្បូងឃ្មុំមានកម្ពស់15,35m ធៀបព្រឹកថ្ងៃម្សិលមិញទឹកឡើង0,35m​ ធៀបឆ្នាំមុន ឆ្នាំនេះខ្ពស់ជាង0,39m​ កម្ពស់ទឹកប្រកាសឲ្យមានការប្រុងប្រយ័ត្ន​ 15,20m៕

ចែករំលែក

បញ្ចេញយោបល់