នៅថ្ងៃទី២៩ ខែវិច្ឆិកា ឆ្នាំ២០១៦ នេះ លោកស្រី ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា និងសហការី បានចុះសួរសុខទុក្ខ និងនាំយកអំណោយមនុស្សធម៌របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា រួមមាន ថវិកា សម្ភារៈប្រើប្រាស់ និងគ្រឿងឧបភោគ-បរិភោគមួយចំនួន មកជូនគ្រួសារជនពិការទាំងពីរនាក់ប្តីប្រពន្ធ ដែលកំពុងជួបការលំបាកខ្វះខាតខ្លាំង រស់នៅបន្ទប់ជួល ក្នុងភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល។
គ្រួសារពិការនេះមាន ៖
លោក ផុន ផន អាយុ ៣០ឆ្នាំ ពិការភ្នែកទាំងសង្ខាង ត្រូវជាប្តី និងជានិស្សិតឆ្នាំទី ២នៃសាកលវិទ្យាល័យភូមិន្ទវិចិត្រសិល្បៈ។
អ្នកស្រី សាយ សុភាព អាយុ ២៧ឆ្នាំ ពិការភ្នែកទាំងសង្ខាង ត្រូវជាប្រពន្ធ ទើបឆ្លងទន្លេរួចរយៈពេល ៨ថ្ងៃ បានកូនប្រុសម្នាក់។
លោកយាយ អួន នីន អាយុ ៦៤ឆ្នាំ ពិការជើងឆ្វេង ត្រូវជាម្តាយ។
គ្រួសារនេះមានការលំបាកខ្លាំង ដោយសារសុទ្ធតែជាអ្នកពិការ ហើយពឹងពាក់ទាំងស្រុងលើកម្លាំងមនុស្សតែម្នាក់គឺ លោក ផុន ផន ជាមេគ្រួសារ ដែលមានទេពកោសល្យខាងចម្រៀងសម័យ។ ពេលមានអាពាហ៍ពិពាហ៍ ឬកម្មវិធីជប់លៀងម្តងៗនៅក្រុងតាខ្មៅ គាត់តែងសុំគេច្រៀងមួយ ឬពីរបទដើម្បីបានថវិកាខ្លះ គួបផ្សំជាមួយថវិកាដែលគេ ដាក់ទានឱ្យពេលគាត់ច្រៀង ជាមួយនឹងឧបករណ៍ច្រៀងសាមញ្ញមួយគ្រឿង នៅតាមផ្សារនានា។
ថ្ងៃនេះ គ្រួសារពួកគាត់មានក្តីរំភើបក្រៃលែង ដោយបានការសណ្តោសប្រណីពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់ឱ្យសហការីចុះជួបដោយផ្ទាល់ និងនាំយកអំណោយជាច្រើនមកសម្រាលការលំបាកជូនគ្រួសារគាត់នាពេលនេះ។ ពួកគាត់បានបញ្ជាក់ថា ពួកគាត់បានដឹងយ៉ាងច្បាស់ពីទឹកចិត្តសប្បុរសរបស់ សម្តេចកិត្តិព្រឹទ្ធបណ្ឌិត ដែលដែលជានិច្ចកាលយកចិត្តទុកដាក់ និងមិនដែលភ្លេចពីសុខទុក្ខរបស់ជនពិការទូទៅជួបការលំបាកនៅទូទាំងប្រទេស មិនត្រឹមតែគ្រួសារពួកគាត់នោះទេ៕
